KA var undir 1-2 í úrslitaeinvíginu við Val um Íslandsmeistaratitilinn í handbolta árið 2002. Liðin mættust í fjórða leiknum í KA-Heimilinu þann 8. maí 2002 og KA liðið þurfti nauðsynlega á sigri að halda til að halda vonum sínum á lífi. Leikurinn var vægast sagt stál í stál og voru taugar allra á staðnum þandar til hins ítrasta. Lítið var skorað en KA leiddi 8-7 í hléinu. Sama var upp á teningunum í þeim síðari og ljóst að enginn sem var á svæðinu mun gleyma þessum leik. Að lokum vann KA lífsnauðsynlegan 17-16 sigur og tryggði sér þar með hreinan úrslitaleik að Hlíðarenda um titilinn. Hjá KA var Heimir Örn Árnason og Baldvin Þorsteinsson markahæstir með 4 mörk, Andrius Stelmokas gerði 3, Jóhann Gunnar Jóhannsson 2, Halldór Jóhann Sigfússon 2, Heiðmar Felixson 1 og Sævar Árnason 1 mark. Hjá Val var Bjarki Sigurðsson markahæstur með 6 mörk, Einar Gunnarsson 3, Freyr Brynjarsson 3, Markús Máni Michaelsson 2, Sigfús Sigurðsson 1 og Snorri Steinn Guðjónsson 1 mark.