تابعني على حساباتي : تويتر : i_majeed97@ انستقرام : i_majeed97 سناب : i_majeed97 قصة احمد الفريدي قبل ايام اعلن نادي القادسية تعاقده مع اللاعب احمد الفريدي وانتشرت صورة للفريدي في تدريبات الفريق وكثير من الناشطين في وسائل التواصل سخر من وزن اللاعب وانه كيف بيرجع يلعب كوره .. احمد الفريدي اللي كان يتوقع انه يصبح النجم الاول للسعودية نظرا لبدايته القوية مع نادي الهلال منذ صعوده للفريق الاول حجز مكانه اساسية مع الفريق وكان يقدم مستويات رهيبه يمتلك مهاره وقدرة فائقه لصناعة اللعب وروقان بالملعب .. لكن مسيرة اللاعب اتخذت منحنى آخر بعد خروجه من نادي الهلال. وسبب تدهور مسيرة احمد الفريدي سبب واحد فقط وهو قاله بنفسه في لقاء تلفزيوني و بتتعرفون عليه نهاية المقطع اول شيء بداية القصة هي قبل دخوله فترة الستة شهور من نهاية عقده مع الهلال ادارة الهلال قدمت له عرض وفق امكانياتها المادية لكن الفريدي رفض العرض وطالب بملبغ اكبر. اللاعب وبعد دخوله لفترة الستة شهور بدء يساوم ادارة الهلال بالعروض المقدمة له ليضغط عليها لرفع عرضها ولكن ادارة الهلال لا زالت متمسكة بعرضها ولن تزيد . الفريدي صرح ان لديه اربع عروض واكثر نادي يقدم له فلوس راح يقبل عرضه وهذا اللي صار نادي الاتحاد برئاسة الاستاذ محمد الفايز قدمت عرض بقيمة ٣٠ مليون ريال .. واتفق معهم الفريدي وانتقل للاتحاد .. واستقبلته جماهير العميد استقبال تاريخي ماقد صار للاعب سعودي في المطار وفي التدريبات لكنه فشل معهم ، قرار انتقاله للاتحاد من اغرب القرارات اللي ممكن تشوفها يعني الاتحاد كان في اسوء مستوياته ومشاكل ونهاية حقبة هذا على الجانب الرياضي. اما الجانب المالي اللي يعتبر السبب الرئيس لانتقال الفريدي للاتحاد ، الديون كانت مغرقه النادي وكانوا مايقدرون يدفعون رواتب اللاعبين لدرجة ان محمد نور عرض على ادارة النادي سلفة مليونين تمشي امورهم .. يعرضون عليك ٣٠ مليون وانت عارف انك بتدخل معهم في مشاكل الرواتب وتأخيرها .. ونفس السبب اللي جعل الفريدي ينتقل للاتحاد هو نفسه اللي خلاه يخرج منه بعد موسم ونصف لعب فيها ١١ مباراة فقط ، وانتقل للنصر برئاسة الامير فيصل بن تركي ولعب موسم اول نقدر نقول جيد لكن في نهاية الموسم اصيب بالرباط الصليبي وماكانت اول مشاكله مع الاصابات في كل موسم لعبه الفريدي لازم يغير فترة طويله بسبب اصابة معينة وهذي اثرت في مسيرة احمد ولكن السبب الرئيسي لتدهور مستوى الفريدي مع النصر هو انشغاله عن كرة القدم وتركيزه في التجارة يارجل كان يروح الصين يشتري بضايع لتجارته في وسط معمعة الموسم !! اللاعب صار تفكيره خارج الملعب ولعبه لكرة القدم اصبح مادي بحت مو اصبح الا من زمان وهو مادي وهذا من حقه لكن كرة القدم مو بس فلوس ، الفريدي يوم تأخر النصر بدفع رواتبه اضرب عن التدريب اسبوع كامل وقال انا عندي تجاره وشغلي تعطل عندي التزامات التجارة الله يبارك له ويرزقه ويرزقنا لكن وكّل احد من اللي تثق فيهم يسيرون هذي الامور وانت ركز بالكوره .. لاعبين عالميين يمتكلون ماركات ومستواهم ثابت وناخذ مثال كريستيانو رونالدو عنده شركات وماركه باسمه لكن موكلها لناس يشغلونها له وهو مركز بالملعب فقط . يعني مايقدر يوكل احد يهتم لشؤونه التجارية ويهتم بكرة القدم ؟ الا لكن هنا نجي لسبب تدهور مسيرة الفريدي بعدما كان يتوقع الكثير انه يخطي خطى يوسف الثنيان اصبح لاعب يسخر منه كذا مره بسبب وزنه الزائد .. السبب هو افتقاده للشغف في كرة القدم اللاعب ماعنده شغف ماعنده طموح ماخذها مثل الوظيفة ويثبت صحة هذا الكلام مثل ماقلنا اهتمامه بالتجارة وهو لاعب وايضا له مقابلة تلفزيونية عبر قناة لاين سبورت تلخص لك ليه مسيرة احمد الفريدي كذا. تخيل هذا التصريح في عام ٢٠١١ يعني كان عمر الفريدي ٢٣ وقتها ويقول هالكلام !!! اترك لكم التعليق ؟ اللاعب لو عنده شغف ويبي النجاح في كرة القدم كان استمر مع الهلال واصبح واحد من اساطيره خصوصا بعد تحقيق الهلال لدوري ابطال اسيا تخيل موهبة الفريدي العظيمة بجانب كاريلو وخلف غوميز وبيكون قائد الهلال كونه ثاني اقدم لاعب بعد الشلهوب ، لكن للاسف مانقدر نقول الا كان بالامكان افضل مما كان.